У пятніцу на Валожыншчыне міліцыянтамі быў разагнаны летнік, які ладзіла незарэгістранае Задзіночаньне беларускіх студэнтаў. Летнік павінен быў доўжыцца пяць дзён, але ўжо на другі дзень на месца лягеру прыехалі супрацоўнікі міліцыі і КДБ, якія затрымалі шасьцёх удзельнікаў адпачынку. Хлопцы знаходзяцца ў Валожынскім аддзяленьні міліцыі нібыта для высьвятленьня асобы. Не выключана, што міліцыянты складуць на іх адміністрацыйныя пратаколы за дробнае хуліганства.

Управа “Маладога фронту” падала позву ў суд горада Менска супраць Упраўленьня юстыцыі Менгарвыканкаму з патрабаваньнем прытрымлівацца закону аб грамадзкіх аб`яднаньнях і зарэгістраваць “Малады фронт”. Пра гэта гаворыцца ў паведамленьні для прэсы незарэгістраванай арганізацыі “Малады фронт”.