Намесьнік старшыні Рады моладзі БНФ Іля Богдан атрымаў позву ў суд Заводзкага раёну гораду Менску.

Паводле позвы актывіста абвінавачваюць у дробным хуліганстве і інкрымінуюць арт. 17.1 КаАП РБ. Сёньня ў судзе хлопцу паведамілі, што адміністрацыйная справа, заведзеная на яго, мае дачыненьне да затрыманьня моладзі БНФ у вёсцы Косава, што пад Івацэвічамі.

У Баранавічах прайшлі адміністрацыйныя суды над Ганнай і Тацьцянай Шапуцька. Маці і дачка былі затрыманы міліцыянтамі 10 верасьня разам зь іншымі актывістамі, якія сабраліся падтрымаць актывіста “Маладога Фронту” Яраслава Грышчэню.

Учора дэкан матэматычнага факультэту Гомельскага дзяржаўнага ўнівэрсытэту імя Францішка Скарыны Сяргей Жогаль уручыў студэнту-выдатніку 3 курсу Зьміцеру Жалезьнічэнку выпіску з загаду рэктара Аляксандра Рагачова пра адлічэньне з унівэрсытэту. Афіцыйна ў загадзе напісана: “за сыстэматычнае парушэньне Правілаў унутранага распарадку ўнівэрсытэту”.