Праваабаронцы падалі ў Вярхоўны суд скаргу на дзеяньні Мін'юсту, які адмовіў у рэгістрацыі Грамадзкага праваабарончага аб’яднаньня “Вясна”.

Распачалася новая хваля арыштаў актывістаў. На гэты раз яна прымеркавана акцыі, прысьвечанай "Эўрапейскаму маршу". За апошнія 3 сутак на вуліцах Менску спэцназаўцы міліцыі затрымалі некалькі дзясяткаў чалавек. Арыштоўваюць ня толькі па факту расклейкі ўлётак, прысьвечаных акцыі, а нават па факту наяўнасьці друкаванай прадукцыі альбо атрыбутыкі, прымеркаванай “Эўрапейскаму маршу”.

Палітвязень Зьміцер Дашкевіч паведаміў у пісьме, што сьледчыя КДБ завялі супраць яго новую крымінальную справу. Цяпер яго вінавацяць паводле арт. 402 — за адмову даваць паказаньні.

Стала вядома, што 21 верасьня дазнавацель управы КДБ па Гомельскай вобласьці старэйшы лейтэнант Коласаў А.В. вынес пастанову аб прызнаньні падозраным Кірыла Атаманчыка ў крымінальнай справе па артыкулу 193-1 КК РБ "Дзейнасьць ад імя незарэгісраванай арганізацыі".

Уначы з пятніцы на суботу супрацоўнікі міліцыі затрымалі каля 40 дзяўчат і хлопцаў, якія на двух аўтобусах ехалі ва ўкраінскі Луцк на фэст “Права быць свабодным”. Першы аўтобус затрымалі бліжэй да Дзяржынска, другі – каля Стоўбцаў. 15 чалавек з усіх затрыманых здолелі перасячы беларуска-ўкраінскую мяжу.