Сёньня адбыўся суд над Тацьцянай Цішкевіч.  Яна была затрыманая 7 верасьня 2007 году. У той дзень яна спрабавала высьветліць лёс траіх затрыманых актывістаў. Але была ў грубае форме выкінута з РУУСа. Пасьля чаго Тацьцяна паспрабавала напісаць скаргу на дзеяньні супрацоўнікаў дзяжурнай службы Цэнтральнага РУУСа, але была затрыманая.  

У Салігорску затрыманы Аляксандр Цацура – лідэр мясцовых прадпрымальнікаў, сябра незарэгістраванага грамадзкага аб’яднаньня “За свабоднае разьвіцьцё прадпрымальніцтва”.

У Берасьці затрыманы яшчэ двое актывістаў руху “За Свабоду” Віталь Сымонік і Паліна Панасюк. Яны спрабавалі перадаць ежу Андрэю Шарэндзе ў Маскоўскім судзе г.Берасьце, дзе яго павінны былі судзіць. Супрацоўнікі міліцыі ў грубай фізічнай форме запхнулі актывістаў у міліцэйскую машыну.

У Берасьці ля ўваходу ў Маскоўскага раёну затрыманы праваабаронца Раман Кісьляк. Ён быў дастаўлены ў РАУС Маскоўскага раёну г.Берасьце, дзе на яго склаладаюць пратакол аб адміністраціўным правапарушэньні.

Судзьдзя Першамайскага раёну Юры Гарбатоўскі  не знайшоў магчымым разглядаць справу старшыні аргкамітэту “Эўрапейскага маршу” Віктара Івашкевіча на падставе тых дакумэнтаў, што прадставілі міліцыянты. Пратаколы былі адпраўлены на дапрацоўку, а палітык вызвалены.

Каліноўца Яўгена Скарабутана затрымалі ўчора а 10-е гадзіне вечара на гарадзенскім аўтавакзале. Яго даставілі ў Кастрычніцкі РАУС г.Горадні й абвінавацелі ў дробным хуліганстве. Ноч Яўген правёў у гарадзенскім пастарунку.

Сёньня зранку ў Берасьце каля пад’езду свайго дому быў затрыманы актывіст Руху “За Свабоду” Андрэй Шарэнда. Ён быў дастаўлены ў Маскоўскі РАУС г.Берасьце для складаньня пратакола.

Пасьля чатырохгадзіннага разбору наваполацкі суд вынес пастанову ў справе грамадзкіх актывістаў, якія спрабавалі пачаць кампанію адкліканьня дэпутатаў. Паводле рашэньня суду, за парушэньне Выбарчага кодэксу Валер Шаўчэнка аштрафаваны на 1 050 000, Ігар Сухарукаў — на 900 000, Антон Ясіновіч — на 750 000 рублёў (адпаведна 35, 30 і 25 базавых велічыняў).

Жыхар Сьветлагорску Тэльман Маслюкоў быў дапытаны ў КДБ у якасьці сьведкі па крымінальнае справе “Маладога Фронту”. Супрацоўнікаў КДБ цікавіла інфармацыя аб грамадзкай дзейнасьці студэнта ЭГУ Арсеня Ягорчанкі.

Сёньня ў судзе Першамайскага раёну Менску будуць судзіць старшыню аргкамітэту Эўрапейскага маршу, які заплянаваны на 14 кастрычніка, Віктара Івашкевіча. Яго абвінавачваюць у закліку ўдзельнічаць у несанкцыянаванай акцыі. Івашкевіча затрымалі ўчора на ганку кавярні “Эль-Памідора” разам са старшынём аргкамітэту Сацыяльнага маршу Валерыем Ухналёвым. Яны разам з чатырма сябрамі адзначалі дзень народзінаў Івашкевіча. На ганку іх чакалі спэцназаўцы.