Адразу пасьля суду больш за дваццаць чалавек з тых, што прысутнічалі на судзе, накіраваліся ў бок салігорскага райаддзелу міліцыі. Першымі словамі Івана Шылы, як толькі ён выйшаў на ганак суду, быў заклік ісьці падтрымаць тых людзей, якіх сёньня раніцай спэцназ жорстка зьбіў, затрымаў і завёз у гэты аддзел.

А 16-й гадзіне былі затрыманыя Ільля Шыла, Дзяніс Карноў, Кася Галіцкая, Аляксей Шэін, Крысьціна Самойлава, Андрусь Тычына.

На ўезьдзе ў горад а 17-й гадзіне стала вядома,  што затрымана машына, у якой кіраваліся ў горад Павал Севярынец, Барыс Гарэцкі і Алесь Галіеў.

Нясьвіскі суд прызнаў актывістку "Маладога фронту" Насту Азарку вінаватай у дзейнасьці ад імя незарэгістраванай арганізацыі. Суд аштрафаваў яе на 40 базавых велічыняў – гэта 1 240 000 рублёў.

Каля будынку суду ў Нясьвіжы, дзе адбываецца судовы разгляд крымінальнай справы над моладзевай актывісткай Настай Азаркай, якую абвінавачваюць ва ўдзеле ў дзейнасьці незарэгістраванай арганізацыі "МФ", супрацоўнікі міліцыі пачалі хаваць хлопцаў у футболках з надпісам "Малады Фронт"     і спрабавалі затрымаць адну жанчыну.

Сёньня ў Салігрорску ў часе суду над сябрам “Маладога фронту” Іванам Шылам спэцназаўцы затрымалі каля 15 актывістаў. У міліцэйскіх пастарунках на іх склалі пратаколы. Затрыманыя паведамілі па тэлефоне, што іх зьбівалі ў міліцэйскім аўтобусе.