Хлопца затрымалі дзесьці а 18:00 у раёне вуліцы Крапоткіна. У заплечніку Кастуся знайшлі некалькі налепак да “Эўрапейскага маршу”. Міліцыянты адвезьлі Гарэцкага ў РУУС Цэнтральнага раёну сталіцы, дзе складаюць пратакол за распаўсюджваньне друкаваных выданьняў.

У судзе Цэнтральнага раёну Менску сёньня судзілі сябру аргкамітэту ў справе правядзеньня "Эўрапейскага маршу" Зьмітра Бародку, праваабаронцу Сьвятлану Гарохавік і прадпрымальніка Леаніда Навіцкага на 15 сутак кожнага.

Ля гандлёвага цэнтру “Паркінг” у Менску міліцыянты затрымалі аднаго зь лідэраў прадпрымальніцкага руху Алеся Макаева. Яго і Алеся Поклада адвезьлі ў Савецкі РАУС.

Сёньня Менскі гарадзкі суд разгледзеў кассацыйную скаргу на пастанову Цэнтральнага райсуду сталіцы, згодна з якой па палітычна матываванай крымінальнай справе на два гады калёніі строгага рэжыму быў асуджаны палітык і публіцыст Андрэй Клімаў.

У Страсбурзе адбываюцца грамадзкія слуханьні пры Парлямэнцкай Асамблеі Рады Эўропы. Яны прысьвечаныя пытаньням развіцьця грамадзкай супольнасьці й правоў чалавека. Адмысловай тэмай у слуханьнях зьяўляецца й беларускае пытаньне. З дакладам аб сітуацыі на Беларусі выступіла Іна Кулей, якая заклікала эўрапейскую супольнасьць праявіць салідарнасьць падчас Эўрапейскага маршу .

У Горадні працягваецца “паляваньне” на грамадзка-палітычных актывістаў. Толькі ў нядзелю  пасьля 5 сутак адміністрацыйнага арышту выйшаў на волю Яўген Скрабутан, а ўчора ўжо  ў Ленінскім і Кастрычніцкім судах гораду адбыліся суды над актывістамі партыі АГП.