У менскім клюбе «Фартуна» мусіла адбыцца прэзэнтацыя новага альбому гурта «Штазі». Па словах лідэра «НД» Аляксандра Кулінковіча канцэрт забараніў аддзел ідэалёгіі Партызанскага раёну.

Кіраўнік баранавіцкай філіі незарэгістраванай арганізацыі “Малады фронт” Яраслаў Грышчэня ад сёньняшняга дня беспрацоўны. Месяц таму Яраслаў уладкаваўся на працу ў Палац культуры чыгуначнікаў, а праз два тыдні трапіў у аўтааварыю і атрымаў бальнічны ліст. Яраслаў лічыць, што нагодай для звальненьня стала ягоная грамадзка-палітычная дзейнасьць.

Беларускія праваабаронцы патрабуюць адмяніць абавязковае размеркаваньне студэнтаў, альбо прыбраць з Канстытуцыі права беларусаў на бясплатную адукацыю.

Cёньня актывіст руху “За свабоду” Павал Батуеў быў выкліканы ў пракуратуру ў якасьці сьведкі. Старэйшага сьледчага Зьміцера Дзешука цікавяць падзеі 7 лістапада, што адбыліся ў Салігорску.