Амаль палову тэрміна правёў за кратамі прадпрымальнік з Ваўкавыску Мікалай Аўтуховіч. Асуджаны за нявыплату падаткаў Аўтуховіч з самога пачатку заяўляў, што яго справа палітычная, што ўлады не даравалі яму крытыкі падатковых і праваахоўных органаў. Да суда ў знак пратэсту прадпрымальнік галадаў 70(!) дзён. Аўтуховіч страціў 40 кілаграмаў вагі, яго прывезлі ў калонію ў вельмі цяжкім стане.

Прыпынены крымінальныя справы супраць актывістаў апазіцыі Аляксандра Урыўскага, Аляксандры Ясюк і Натальлі Старасцінай. Каб прыйсьці да такой высновы следчаму спатрэбілася роўна два месяцы.

3 чэрвеня спаўняецца два месяцы з моманту затрымання апазіцыйнага лідэра Андрэя Клімава. Праваахоўныя органы мусяць вызначыць меру стрымання для палітыка: вызваліць яго ці працягнуць утрымліваць пад вартай. Нагадаем, што некалькі дзён таму Клімава змясцілі ў рэспубліканскі турэмны шпіталь – у палітвязня праблемы з сэрцам.

Дзяржаўны абвінаваўца запатрабаваў аштрафаваць актывістаў “Маладога Фронту” Алега Корбана, Барыса Гарэцкага, Насту Палажанку і Змітра Хведарука на суму ў 500 базавых велічынь (15.500.000 беларускіх рублёў – 7.242 даляраў ЗША) кожнага. Відавочна, што ўлады вырашылі не абвастраць сітуацыю з палітычным пераследам моладзевых актывістаў. Нагадаем, што лідэр “Маладога Фронту” Зміцер Дашкевіч раней быў прысуджаны да 1,5 гадоў пазбаўлення свабоды ў калоніі агульнага рэжыму.

Суд Савецкага раёна Менска вынес прысуды актывістам “Маладога Фронту”. Змітра Хведарука аштрафавалі на 40 базавых велічынь (1 мільён 240 тысяч беларускіх рублёў – 580 даляраў ЗША), Аляксей Янушэўскі, Барыс Гарэцкі і Алег Корбан аштрафаваныя на 30 базавых велічынь (930 тысяч або 435 даляраў ЗША). Непаўналетняй Насці Палажанцы вынесенае папярэджанне. На свабодзе актывістаў сустрэлі некалькі сотняў чалавек з кветкамі. Людзі скандавалі “Жыве Беларусь!” і апладзіравалі актывістам.

У судзе Савецкага раёна Менску працягваецца працэс па справе актывістаў “Маладога Фронту”. Дзяржаўны абвінаваўца заявіла падчас выступу, што “Малады фронт” хоча ўзяць палітычную ўладу ў краіне шляхам масавых вулічных акцый. Доказам гэтага ёсьць раздрукоўкі тэлефонных размоваў, а таксама аўдыёзапісы сходаў МФ, што адбыліся 29 верасьня 2006 года, 25 студзеня, 29 студзеня, 1 лютага, 4 лютага 2007 года.

Больш за 400 чалавек прыйшлі сёння да суду Савецкага раёна Менска, каб выказаць пратэст суду над актывістамі арганізацыі “Малады Фронт”. Людзі скандуюць апазіцыйныя лозунгі, трымаюць у руках партрэты падсудных, расцяжкі “Свабоду маладафронтаўцам!”, плакаты “Патрабуем справядлівага суду!”, “Дзе тут праўда?”, “Абаронім дзяцей ад гвалту”.

25-га траўня з гомельскай жаночай турмы на волю выйшла праваабаронца Кацярына Садоўская. Нагадаем, што праваабаронцу прусудзілі да двух гадоў калоніі агульнага рэжыму за патрабаванне правесці псіхіятрычнае абследванне Аляксандра Лукашэнкі, а таксама нібыта за абразу судзей.

Учорашняя акцыя “Не адмене льгот!” у студэнцкім гарадку БДУ каля плошчы Незалежнасці скончылася затрыманнем двух чалавек і нападам людзьмі ў цывільным на дзяўчыну, як высветлілася пазней, Таццяну Цішкевіч. Пра гэта паведамляе Хартыя`97.

Менскія студэнты Ян Міхайлаў і Мікалай Коршунаў, удзельнікі ўчорашняй акцыі супраць адмены льгот на плошчы Незалежнасці ў Менску, прысуджаныя сёння судом Маскоўскага раёна Менска да выплаты штрафаў у памеры 10 базавых велічынь кожны (310 тысяч беларускіх рублёў).