Адказаць на каментар

Камітэт "Салідарнасьць" наведаў маці палітыка Юрыя Захаранкі, які знік 10 гадоў таму пры нявысветленых абставінах.

Ульяна Захаранка пражывае ў вёсцы Васілевічы Гомельскага раёну. Ёй ужо 85 гадоў.

Сябры Камітэту абароны рэпрэсаваных “Салідарнасць” наведваюць спадарыню Ўльяну штогод. Яны ўражаны цеплынёй і светлым аптымізмам гэтага чалавека.

− Ульяна сказала, што не губляе веры ўбачыць свайго сына. Яна падчас бяседы распавяла пра дзяцінства Юрыя Захаранкі, яго станаўленне, стасункі са сваякамі і сябрамі. Ульяна − моцны, мудры, шчыры, адказны чалавек, сапраўдная жанчына-маці, − кажа Іна Кулей.

Праваабаронца Андрэй Сушко, які наведаў Васілевічы ўпершыню, кажа, што паездка моцна паўплывала на яго:

− Сустрэцца з Ульянай для мяне, як грамадзяніна, было вельмі важна. Я адчуў на сабе ўсю трагедыю гэтай сям’і. Я пачаў успрымаць гэта асабіста, а не абстрактна. Лічу, што было б вельмі добра моладзевым актывістам бачыцца з такімі людзьмі як мага часьцей.

Дакладна выказала меркаваньне ўсіх прысутных Людміла Гразнова. На яе думку, Юры Захаранка, Зьміцер Завадскі, Віктар Ганчар, Анатоль Красоўскі, Генадзь Карпенка − імёны сумленьня Беларусі.