У аўторак з раніцы супрацоўнікі КДБ правялі ператрус на менскай кватэры бацькоў Корсака, дзе ён прапісаны. Прыкладна а другой гадзіне дня чатыры «кадэбісты» ў суправаджаньні панятых пачалі ператрус на кватэры цешчы Ігара Тацяны Цяцёркінай. Вобшук доўжыўся амаль тры гадзіны. Паводле спн. Цяцёркінай, чэкістаў не цікавілі паперы ці бел-чырвона-белыя сьцягі. Яны адразу знайшлі і канфіскавалі пакунак з балтамі і гайкамі, адны гумовыя пальчаткі, хаця ў кватэры іх было нашмат болей, а таксама пакеты з-пад соку, якія спн. Тацяна выкарыстоўвае для расады. У кампутары Ігара супрацоўнікі КДБ шукалі ўсе дакумэнты, якія могуць быць зьвязаныя з выбухоўкай.

Прыкладна а пятай гадзіне Ігара адвезьлі на допыт на Казлова, 4 (адміністрацыйны будынак Інстытуту нацыянальнай бясьпекі). Толькі пасьля паўночы мужчына змог патэлефанаваць дадому, каб паведаміць, што ён зьяўляецца падазроным па крымінальнай справе выбуху 4 ліпеня і яго на трое сутак зьмяшчаюць у ізалятар часовага ўтрыманьня.

Тацяна Цяцёркіна кажа, што 3 ліпеня сям’я знаходзілася на лецішчы. Вярнуліся яны ў Менску толькі а дзевятай вечара. «На сьвяткаваньне, натуральна, ніхто не хадзіў», – кажа жанчына.

Як кажа жонка Ігара Вольга Корсак, сьледчым па справе яе мужа зьяўляецца капітан СУПР ГУУС Танана А.В.

Апошнія гады Ігар Корсак ня ўдзельнічаў у палітычным жыцьці, хаця ў свой час належаў да «Белага легіёну».

У ізалятары на Акрэсьціна таксама знаходзіцца Міраслаў Лазоўскі, яшчэ адзін былы сябра «Белага легіёну». У аўторак ператрус адбыўся і ў кватэры Міраслава. Былі канфіскаваныя сыстэмны блёк кампутара, нататнікі, адрасныя кнігі, візытоўкі. Усяго 31 найменьне.

Паводле словаў жонкі Міраслава Лазоўскага, намесьніцы старшыні МГА «Бацькаўшчына» і былой прэс-сакратаркі Казуліна Ніны Шыдлоўскай, яе мужа спачатку адвезьлі ў гарадзкое ўпраўленьне КДБ, а ўжо потым у сьледчы аддзел МУС (вул. Сапёраў, 7). Адтуль Лазоўскі змог патэлефанаваць жонцы, каб яна пад’ехала на гэты адрас. Шыдлоўская кажа, што змагла пабачыць Міраслава, які перадаў ёй асабістыя рэчы.

Ніна Шыдлоўская ў сераду змагла перадаць у камэру некаторыя рэчы.

Паводле  Нашай Нівы