Сёньня з улёткамі пра Сацыяльны марш быў затрыманы актывіст Партыі БНФ Вацлаў Арэшка. Яго павезьлі ў аддзел унутраных справаў Цэнтральнага раёну.

Па сваім тэлефоне Вацлаў Арэшка пакуль не адказвае. Паводле Валера Ўхналёва, у актывіста было шмат улётак з абвесткамі пра тое, што 4 лістапада ў Менску адбудзецца дазволены ўладамі Сацыяльны марш, што пачатак яго а 12 гадзіне ля Акадэміі навук.

Спадар Ухналёў перакананы, што ўлёткі міліцыя ня верне. Увогуле, адзначае ён, улады замінаюць інфармаваньню пра акцыю, скіраваную на зьмену сацыяльнай палітыкі ў краіне.

Учора кіраўнік аргкамітэту Сацыяльнага маршу атрымаў ліст ад намесьніцы кіраўніка Адміністрацыі прэзыдэнта Натальлі Пяткевіч.

Нагадаем, што раней лісты з прапановай абмеркаваць варыянты правядзеньня Сацыяльнага маршу і сацыяльную палітыку дзяржавы былі накіраваны ў Адміністрацыю прэзыдэнта і асабіста Натальлі Пяткевіч.

Спадарыня Пяткевіч адказала, што, на яе погляд, такія праблемы, як сацыяльная палітыка, сацыяльныя гарантыі, немагчыма вырашаць праз вулічныя акцыі. Паводле Ўхналёва, Пяткевіч паведаміла, што Адміністрацыя прэзыдэнта шукае новыя магчымасьці для вырашэньня праблемы з ільготамі.

Паводле радыё Свабода