Учора з менскай турмы на Акрэсьціна выйшаў на волю віцебскі прадпрымальнік Сяргея Парсюкевіч, які быў арыштаваны за ўдзел у акцыі 10 студзеня. Ён распавёў, што ў мінулы панядзелак у турме яго зьбіў супрацоўнік міліцыі.

Судова-медычнай экспэртызай засьведчана, што ў Сяргея Парсюкевіча ёсьць сінякі ды раны на целе. Па словах пацярпелага, на шыі былі яшчэ сляды таго, што яго душылі, але за тыдзень яны сышлі.

Парсюкевіч, які хварэе на астму і мае хранічную хваробу страўніка, кажа, што пакуль не зьвяртаўся ў праваахоўныя органы па факце збіцця — пасьля зняволеньня проста не мае фізічных сілаў. А вось міліцыянт абвінаваціў самога зьняволенага ў нападзе. На дадзены момант пракуратура праводзіць па гэтай заяве праверку.

4 лютага Сяргей Парсюкевіч мусіць прыехаць у Менск на чарговую гутарку са сьледчымі.

Паводле Эўрапейскага радыё