За некалькі хвілінаў да заплянаванага пачатку акцыі прадпрымальнікаў міліцыянты схапілі лідэра руху “За свабоду” Аляксандра Мілінкевіча на плошчы Перамогі. Разам зь ім затрымалі Аляксея Кавальца і Алеся Лагвінца.

Усіх адвезьлі ў сьледчы камітэт, што на вуліцы Сапёраў, і дапыталі ў крымінальнай справе, якую раней распачалі ў сувязі з падзеямі 10 студзеня.

Нагадаем: 10 студзеня больш за дзьве тысячы ўдзельнікаў акцыі пратэсту прадпрымальнікаў перакрылі праспэкт Незалежнасьці і калёнай прайшлі па праезнай частцы праспэкту да Дому Ўраду.

Міністар унутраных справаў Уладзімер Навумаў назваў гэта масавымі беспарадкамі і паведаміў, што міліцыя распачала крымінальную справу.

Міліцыянты таксама затрымалі Вячаслава Сіўчыка і аднаго зь лідэраў прадпрымальніцкага руху Аляксандра Макаева. Спачатку іх амаль тры гадзіны трымалі ў міліцыі Ленінскага раёну, а потым адвезьлі ў сьледчы камітэт, каб дапытаць у крымінальнай справе.

На Кастрычніцкай плошчы было амаль усё міліцэйскае кіраўніцтва – афіцэры зь міністэрства і з гарадзкога ўпраўленьня ўнутраных справаў. Як толькі на плошчы зьбіралася група зь дзясятак чалавек, яе абкружалі спэцназаўцы і выціскалі людзей з плошчы ў розныя бакі.

На плошчы міліцыянты затрымалі прадпрымальніка з Гомеля Ўладзімера Няпомняшчых разам з жанчынай, прозьвішча якой невядомае. Іх пасадзілі ў міліцэйскі “варанок” і адвезьлі ў Цэнтральны РУУС.

Спэцназаўцы некалькі разоў выціскалі людзей жывымі ланцугамі з Кастрычніцкай плошчы — па праспэкце Незалежнасьці ў бок ГУМу і па вуліцы Энгельса на плошчу Свабоды. Мінакоў не прапускалі. Менавіта такім чынам менчукі даведваліся, што на плошчы заплянаваны мітынг прадпрымальнікаў. У бок уладаў многія людзі выказваліся даволі нэгатыўна.

Падчас разгону патэнцыйных удзельнікаў акцыі спэцназаўцы затрымалі Вольгу Казуліну, якая спрабавала прайсьці з расьцяжкай. Дзяўчыну адвезьлі ў міліцыю Цэнтральнага раёну.

Міліцыянты паведамілі, што пасьля высьвятленьня асобаў усіх затрыманых вызваляць.

Паводле На плошчы міліцыянты затрымалі прадпрымальніка з Гомеля Ўладзімера Няпомняшчых разам з жанчынай, прозьвішча якой невядомае. Іх пасадзілі ў міліцэйскі “варанок” і адвезьлі ў Цэнтральны РУУС.

Міліцыянты паведамілі, што пасьля высьвятленьня асобаў усіх затрыманых вызваляць.

Паводле Радыё Свабода